أبو زيد بيومي
طاطي راسك طاطي طـاطي
انت ف وطن ديمقراطـي
انت بتنعـم بالحرية
بس بشرط تكون مطاطـي
لما تكون شغـال بذمــة
خايف على مصلحة الأمـة
شغلك يطلع من غير لازمـة
علشان مبيعلاش غير واطي
طاطي راسك طاطي طاطي
انت ف وطن ديمقراطي
لما حاميها يكون حراميها
وبلاده ورا ضهره رامـيـها
طالع نازل واكل فيـها
مسنود بالبدلة الظباطـي
طاطي راسك طاطي طاطـي
انت ف وطن ديمقراطي
لما شقاك يصبح مش ليك
فقرك سد السكة علـيك
تتلفّت تلـقى حـوالــيك
إما حرامي و إما عقاطي
طاطي راسك طاطي طاطي
انت ف وطن ديمقراطي
لماتلاقي بــلاد الـدنـيــا
فيها البني آدم حاجة تانية
وانت في الطبقات الدنيا
قرد مسلسل أو وطواطي
طاطي راسك طاطي طاطـي
انت ف وطن ديمقراطي
لما الجهلة يبـقوا أمامك
أو فوقك ماسكين ف زمامك
ويسوقك ع الهـلكة إمامك
تشرب م السم السقراطي
طاطي راسك طاطي طاطي
انت ف وطن ديمقـراطي
لما الكلمة تكون بتدينـك
لما تخبي ف قلبك دينك
لما الذل أشوفه ف عيـنك
هات إحباطك على إحباطي
طاطي راسك طاطي طاطي
انت ف وطن ديمقراطي
انت ف وطن ديمقراطــــي
ليست هناك تعليقات:
إرسال تعليق